I ahu mai tēnei rautaki i ngā kura o Rotorua, i tutuki i a rātou te whakapiki ake i te taetaenga ki te kura me te whakahihikotanga mā te aro pū ki ngā hononga a te kura ki ngā whānau.

Ko Janice Simeon, te kaiako whakawhiti-kura mō te taetaenga ki te kura mō te Kāhui Ako o te Waenga o Rotorua, i te ārahi i te Kāhui Ako o Whakatāne, me te toro atu i ia wiki ki te tautoko i ngā kaimahi ki te whakahaere i ngā take taetaenga ki te kura.

“He painga tō te whakapakari i ngā hononga i waho atu i ngā kēti o te kura. Ko tā te kaiako he tere whakapakari i ngā hononga ki ā mātou tamariki kia pai ai te ako i a rātou. He tino pūkenga tēnā i roto i te whānau,” hei tā Janice.

I te whai kē ngā kura o Whakatāne i ngā uauatanga o te taetaenga ki te kura i mua i te pānga mai o te mate urutā, me ngā raraunga e kīia ana he "weriweri" e te tumuaki matua o te Kāhui Ako me te Kura o Apanui, e Simon Akroyd. “400 ā mātou tamariki i roto i te 4,500 i raro i te 80 paihēneti te taetaenga mai ki te kura, nā kotahi rā i ia wiki e ngaro ana i te kura.”

Ka hīkina te noho rāhui ka tono atu a Simon ki te Tahua Urupare Ohotata me te tono atu ki a Janice ki te āwhina. I runga i ngā mahi ārahi a Janice ka arotahi ngā kaimahi ki ngā tikanga whaitake hei whakapakari i ngā pāhekohekotanga me te whānau. I ētahi wā, he mahi tahi ki ngā nēhi te mahi hei tautoko i ngā tamariki e pāngia ana e tētahi mate e whakararu ana i tō rātou taetaenga ki te kura, i ētahi atu wā he whakarato i ngā pouaka kai ki ngā whānau.

Hei tā te tumuaki tuarua o Te Kura o te Pāroa, a Ramia Honatana, ka haria atu e ia ngā pouaka kai hei tautoko i ngā whānau ki te tiaki i ā rātou tamariki. “Kei te mōhio tonu au e whakamiha ana aua whānau. He pai ki a rātou taua whakaaro, arā kei konei te kura ki te tautoko i a rātou, ā, kei te whai whakaaro mātou ki ō rātou hiahia. Ka puta atu mātou ki ngā kāinga, kāore mātou e tono ana i ngā whānau kia haramai ki te kura.

“Ina pakari ai te hononga ka wātea te huarahi. Mēnā kei te ngaro tētahi o ngā tamariki, e mōhio tonu ana ka āhei te waea atu, ā, ka whakautu ngā mātua i te waea i runga i te mōhio ki te kaiwaea.”

E ai ki te tumuaki tuarua o te Kura Tuarua o Taoroa, a Jay Haydon-Howard, he hurihanga te tauira hou ki tētahi tikanga whakawhanaunga.

“I mua, he nui ngā whānau i pāngia e tētahi kino, i mahia tētahi mahi mā rātou rānei, i whakangongotia rānei, engari ināianei kua whai wāhi rātou ki taua tukanga. Mēnā he maha ake ngā wā ki te mahi tahi ki te hapori whānui, ki ngā hapū me ngā iwi, ka pakari ake taua whanaungatanga.”

Ko tā Jay, ki te whakatata atu ki ngā whānau i runga i te manaakitanga me te whānaungatanga, kaua ko te whakaaro 'kāore tō tamaiti i tae mai ki te kura', ka tuwhera ngā mahi whakawhitiwhiti kōrero.

“Ināianei kei te whakapā mai te whānau me te kī ake, 'E, e mōhio ana au kāore ia i te kura i tēnei rā. Kua pēnei. I te hiahia noa au ki te whakamōhio i a koe’. Ā, he mahi rawe tēnā mō ngā tāngata karekau i whakapā mai i mua.”

Link to full article (in English):

From a place of care and whanaungatanga — EducationGazette